«Налице тай нарубы»: юбілейный творчый вечур Ивана Завадяка
УЖГОРОД, 22. феб. 2025 — У комуналному закладі «Ужгородська публічна бібліотека» русинськый писатель Иван Завадяк презентовав автобіоґрафічну книгу «Налице тай нарубы». Темов сього выданя стали явні и тайні аспекты совітського періода у жывоті як автора (котрому, подля його слув, и самому прийшло ся быти «шрубиком у совітськуй машині»), так и краю.
Юбілант, котрому в септемброви ся выповнило 85 рокув, пише уд недавна (перві його творы по русинськы выйшли у 2017. рокови в журналі «Отцюзнина»), айбо зато як продуктивно: «Налице тай нарубы» якраз замыкат красну автобіоґрафічну трилоґію, котра ся зачала романом у новелах «Брызґы споминӱв из дітвацтва» (2019) тай трьома повістями, зобратыма довєдна пуд ворошнов назвов «Выпровбалованя любовльôв» (2021).
На столови перед Иваном Ивановичом три обкладкы у єдному стильови. Помагав, каже автор, ай племінник, на плечі котрого лягла робота по оформленю вшыткых трьох выдань. Удну сут ілустрації, вчинені пудкарпатськыма умільцями — обы была и «пропаґанда нашых малярюв», як пудфіґльовує писатель.
Дакулько теплых слув за выданя — а подаґде и за автора лично — выповіли: пудкарпатськый умілець Михаил Белень; літературознатель Иван Сенько; Михаил Зан, котрый написав передслово до «Налице тай нарубы»; Анна Меґела, котра ся занимала коректуров выданя; брат автора Михаил Завадяк; головный редактор журнала «Отцюзнина» Юрій Шипович.
Михаил Зан при слові напомнив за юбілейноє інтервю Ивана Завадяка «Івану Завадяку — славних 85 літ!», доступноє у онлайн-репозитарійови Ужгородського державного універзитета.
Зан, Михайло Петрович
Модеровав стрічу кандидат історичных наук, доцент кафедры політолоґії и державного управліня Михаил Зан.
