Презентація «Отцюзнины» №1 (13) 2024
24 фебруара в Ужгороді, у готелі «Дружба» пройшла презентація первого за сесь рук числа журнала «Отцюзнина» — №1 (13) 2024. Меже другыма звіданками пуднимали ся темы вебсайта и соціалных сіток журнала, оформленя и візуалну ідентичность папірьової версії, вносили ся пропозиції за матеріалы, котрі бы годні были пуйти у будучні числа часописа.
Уд доцента кафедры нової и новітньої исторії тай исторіоґрафії УжНУ, кандидата историчных наук пана Володимира Фенича поступила на далшоє обговореня ідея поміняти попис журнала на «научно-публіцистичный часопис»; дискусія ся докывнула и вопроса можности розміщеня QR-кодув у фізичному выданьови на доступ ид розшыреному исписови жерел и рекомендовануй літературі. Озвучені звіданкы у тум числі будуть дале вынесені на засіданя редколеґії. Присутні на презентації похвалили уровень, на котрому ся наднесь находить журнал, и руст, котрый часопис указує из каждым числом.
Редакція «Отцюзнины» выражає вдячность ушыткым выписовачам и дописовачам журнала, учасникам нынішньої плодовитої дискусії тай ушыткым, тко ся приклав ид журналови як у роботі, так и матеріалнуй пудпорі — без сих люди світ бы ниґда не увидів обновлену «Отцюзнину»!
