Петро Біров — «Голосы Русинів Підкарпатя»

Интервю из молодым карпаторусинськым дизайнером Петром Біровом. Нажыво сесь епізод ся крутив 14. авґуста 2024.

Никайте долув:

Учів ся в Ужгородьскім коледжі умень імени Адалберта Ерделія, а теперь є штудентом Факулты чуджой філології УжНУ.

Коли Петро перебрав ся із старшынов жыти до Ужгорода, втогды ганьбив ся русиньской бісіды. Але під впливом файных цімборів поміняв свої погляды і перешов у комунікаціях на материньскый язык.

Петро — єден з тых представителів молодежи, котра перешла на русиньскый язык, дякуючі словникам і роботі з літературов. Зато його словна база доста інтересна, а бесіда не є натілько засмічена як у многых носителів русиньского языка, лексіка котрых найвеце припоминать „суржик“. Мож вповісти, што то єден з першых хоснователів літературного карпаторусиньского языка.

Окрім того, же Петро Біров робить сайт і ґрафічну обробку журнала «Отцюзнина», вєдно з цімборами він, хоснуючі компютеровы технолоґії, зробив много доброго про Карпаторусинів в просторі інтернету. Тым дав шансу нашій бісіді ступати в ногу з часом…

— lem.fm