Фурт и всягды быв у аванґарді: Олексі Дуді — 84!

26. марця 1941. року в селі Пилипци (товды Воловського района) родив ся Олекса Дуда. Кунчив філолоґічный факултет УжНУ, пак ся перебрав жыти у Мукачово. Учительовав, занимав ся спортом. Фурт и всягды быв у аванґарді: представляв Закарпатя на Всеукрайинськум зїзді учителюв, а у 1988. рокови — на Всесоюзнум зїзді в Москві. Быв членом делеґації од СССР на Олімпійськых играх у 1984. рокови у Сараєві.

Коли русинськоє кываня ожыло по розвалу Союза, Олекса Дуда став єдным из основателюв „Общества подкарпатськых русинув“, першым директором Русинського народного дома в Мукачові. Пан Олекса тепло споминать тоту ейфорію, з котров товды, у кунци 80. рокув – на зачатку 90., у Мукачові й Ужгороді збирали великі мітінґы карпаторусины, одвойовувучи свої права. Люде віровали, што у куртый час наш народ признавуть, и будеме ся хосновати вшыткыма тыма правами, котрі мавуть другі недержавні етносы. Тому и референдум 1991, де ся пудняло звіданя за самоврядну територію, дав файну цифру — 72,8%.

Пан Олекса быв делеґатом першого Світового конґреса русинув у 1991. рокови у Межилаборцях од Пудкарпатя. Розказує, як СКР проходив, споминать Василя Турка-Гетеша, Павла Роберта Маґочія и другых учасникув.