«Криниченька» у Фийнєшлітке

З 29. по 4. юлія 2025 діти-учасникы фолк-рокаша «Криниченька» были у літньому таборі у мадярському Фийнєшлітке. Юні гудакы з Пудкарпатя ходили на екскурсії у аквапарк, ціркус, возили ся на карусельох, качельох, бавили ся и домув понесли преповно файных емоцій од поїздкы за гатар.

Поїздка тай задарьный спочинок про дітий из Пудкарпатя стали возможні вдяку предсідниці русинської громадської орґанізації имени Александера Духновича з Кішварды Тетяні Ерделі тай єї отцьови Михаилови Танчинцю; из боку Украйины в ушореньови поїздкы «Криниченькы» участвовала карпаторусинська орґанізація «Русин-Клуб» (предсідник Юрій Шипович), котра тісно спувпрацює з кішвардувськов орґанізаційов им. А. Духновича.

У подяку за теплый прийом «Криниченька» дала невеликый концерт. Было весело. Позирачі в захваті гойкали «браво!». Кажда дітина дустала диплом и подаркы.