Краєписный диспут: без минулости не є будучности

7–8. мая на базі Великолазького ліцея й Закарпатського обласного краєзнавчого музея им. Т. Легоцького одбыв ся ХІІІ. Реґіоналный научно-методичный інтернет-семінар «Краєзнавство в інтердисциплінарному контексті розвою днешнього ошколованя и наукы». Семінар зобрав 70 учасникув: докторув наук, професорув, кандидатув наук, доцентув, науковых робутникув, аспірантув, педаґоґічных, музейных, бібліотечных робутникув, інфлуенсерув, сященикув-ліценціатув теолоґії, маґіструв, студентув, членув вшылиякых орґанізацій, сполкув, закладув освіты. Од имени общественої орґанізації «Русинськый културолоґічный клуб» выступив Юрій Шипович, представивши журнал «Отцюзнина».

Ціль форума — скапчаня професійных и творчых сил робутникув у сферах ошколованя, културы, наукы, музейного діла тай соціалных служб у ділі реалізації потенціала краєзнавства в інтердисциплінарному контексті розвою сучасного школованя й наукы.

На події ся пуднимали такі звіданкы:

1. Краєзнавство у сучасному «інтернетному» обществі.
2. Вызначні перзоналії Пудкарпатя XX. – XXI. сторуч: їх уплыв и причинок до розвою історії, културы, ошколованя, наукы, умілства, реліґії.
3. Герої російсько-украйинської войны в історії тай сучасности рудного краю.
4. Педаґоґічноє краєзнавство: історія, проблемы, перспективы.
5. Просторово-часові аспекты взайимодії челядника, природы тай красы Карпат.
6. Краєзнавство в розвою обществено-політичного, соціално-економічного тай освітньо-културного простору: пруйшлость и будучность.

Модеровала подію научна керовниця семінара Марія Баяновська, кандидатка педаґоґічных наук, PhD, доцентка катедры теорії и методикы професійного школованя тай іноваційных технолоґій Закарпатського інститута подипломного школованя.

Выступы были вшылиякых тем и форматув — од доповідий и презентацій вытворув літературы онь до майстеркласув. Пуд конець учасникы семінара мали можность навщивити одкрытя выставкы жывописа Аврелії Федор на честь 110. ручниці єї рожденя.