«Історик і проблеми націєтворення: наукова та громадська діяльність Павла Роберта Маґочія»
31. юлія 2024 в Ужгороді ся удбыла презентація нової книгы украинського и карпаторусинського историка, доцента кафедры модерної исторії Украины й зарубіжных країн УжНУ, кандидата историчных наук Володимира Фенича — зберькы есеюв «Історик і проблеми націєтворення: наукова та громадська діяльність Павла Роберта Маґочія» за вызнамного америцького историка, украиніста, карпаторусиніста професора Маґочія.
Подія ся правила из помочов орґанізації «Українсько-Єврейська Зустріч» (Ukrainian Jewish Encounter) и «Українського науково-дослідного та освітнього центру вивчення Голодомору» (Holodomor Research and Education Centre in Ukraine), літньої ошколы. На події были присутні участникы літньої ошколы педаґоґічної методлабораторії «Verba Magistri» тай колеґове Володимира Фенича из факултета исторії тай меженародных удношінь Ужгородського націоналного універзитета. Модеровав презентацію Маріан Токар, доктор наук из державного управліня, професор кафедры політолоґії и державного управліня факултета сосполных наук УжНУ.
Рецензентами роботы стали: проф. Владислав Гриневич, доктор наук из Института політичных и етнонаціоналных изглядовань им. И. Ф. Кураса Націоналної Академії наук Украины, проф. ПгДр Петер Шворц, кандидат наук из Института исторії Філозофського факултета Пряшовського універзитета, доц. Мґр Валерій Падяк, кандидат наук из Института русинського языка и културы Центра языкув и култур націоналных меншын Пряшовського універзитета.
Автор книгы, Володимир Фенич, поділив ся, як у 90-х роках зачав ся быв интересовати исторійов грекокатолицької церьквы на Пудкарпатськуй Руси тай як ся быв спознав из геройом свого нового выданя, Павлом Робертом Маґочійом. Свої назоры за книжку высловили доцент кафедры політолоґії и державного управліня УжНУ, кандидат историчных наук Михаил Зан, доцент кафедры археолоґії, етнолоґії тай културолоґії факултета исторії и меженародных удношінь, кандидат историчных наук Павло Леньо, доцент кафедры археолоґії, етнолоґії тай културолоґії факултета исторії и меженародных удношінь, кандидат историчных наук Павло Худіш и декан факултета исторії и меженародных удношінь, кандидат историчных наук, доцент Віталій Андрейко.
Навщивителі презентації мали можность позвідати Володимира Фенича за йсе выданя тай дустати свої копії уєдно из автоґрафами.
