Ґратулуєме до юбілея, пане професоре!
Днесь сяткує 80 рокув уд дня рожденя єден из майзнамых русинськых діячув нашого часу, без пудпоры котрого бы не было обновленої «Отцюзнины» — русинськый, канадськый тай америцькый історик, професор Павел Роберт Маґочій.
Уд имени редакційної колеґії журнала «Отцюзнина», Русинського културолоґічного клуба и Закарпатського обласного научно-културолоґічного общества им. Александра Духновича вінчуєме Вам, пане професоре:
Муцного здоровля, читавого запасу сил, невычерпної інспірації на всі ваші далші занятя! Най Вам жывот приносит лем задоволеня, а Бог подержит сохташ!
Красно Вам дякуєме за десяткы рокув, котрі сьте дали на роботу над нашов минулостьов, нашов теперішностьов тай нашов будучностьов, за Ваші многі труды и величезну енерґію!
У сесю знакову дату указуєме обкладку слідувучого числа «Отцюзнины» №1 (16) 2025, присяченого професорови Маґочію. В основу обкладкы став портрет юбіланта авторства пудкарпатського маляря Ивана Архія.
