„Формы присутности. Штука Лемків / Карпатскых Русинів“
17. януара 2026. року в Державному етноґрафічному музейови у Варшаві, Польща, удбуде ся формалноє удкрытя выставкы „Формы присутности. Штука Лемків / Карпатскых Русинів“ (пол. „Formy obecności. Sztuka Łemków / Rusinów Karpackich“).
Експозиція буде йти до 30. юнія 2026 и обсяговати бульше 200 творув из Польщі, Словакії, Сербії, Горватії, Румунії, Мадярщины, Украйины, США, Молдавії тай Чехії; на нюй будут представлені як уже знамі умільці, ги Епіфан Дровняк (Никифор), Юрій Новосільськый, Енді Воргол, так и творці щи лиш на пути д славі. Подля орґанізаторув тото перша в історії выставка такых масштабув за лемкув и русинув. Куратором події выступит лемкувськый історик умілства и выкладач Варшавського університета др. Михал Шымко.
Експозиция підкрислят, же штукa Лемків / Карпатскых Русинів не є фольклорным чудаком, але жывом, автономійном і вельовыміровом частю європской культуры. Важным контекстом выставы сут досвідчыня нашого народу: примусовы міґрациі, асиміляция, траґедия Талергофу і акция «Вісла». Памят о тых подіях вертат в творах артистів, а предметы з лемківскых / русиньскых хыж стают ся жывыма свідками істориі і знаками тырваня спільноты, котра хоц розшмарена по світі, оборонила свій язык, достоменніст і памят.
— Др. Михал Шымко, куратор выставкы
Бульше інформації мож найти на сайті музея (у польському языкови): https://ethnomuseum.pl/wystawy-lista/formy-obecnosci/
